O BNG defenderá as opinións da veciñanza sobre as intervencións de Adif en Rábade
![intervencions adif rabade bng daniel castro](https://terrachaxa.com/wp-content/uploads/2023/06/intervencions-adif-rabade-bng-daniel-castro.jpg)
O cabeza de lista do BNG por Lugo ao Congreso, Daniel Castro, visitou a vila de Rábade, onde se interesou pola situación das obras planificadas por ADIF. Daniel Castro afirmou que “vemos positivo que se eliminen os pasos a nivel, mais este tipo de actuacións teñen que realizarse garantindo as mellores condicións para a veciñanza da zona”.
O candidato do BNG anunciou que defenderá no Congreso que ADIF escoite as necesidades das veciñas e veciños de Rábade antes de proceder á execución das obras.
O decálogo de compromisos que o BNG defenderá en Madrid inclúe a mellora nos transportes públicos e conexións dignas no interior do País. “Estamos a falar da reconstrucción dos viaductos da A-6, da electrificación e modernización das liñas de tren (A Coruña – Ferrol e Lugo – A Coruña), ou da implantación das Cercanías Ferroviarias nas áreas urbanas e metropolitanas”, explicou o candidato do BNG.