O BNG recolle en Guitiriz firmas contra a supresión das paradas de autobús
![RECOLLIDA FIRMAS SUPRESION AUTOBUS GUITIRIZ BNG](https://terrachaxa.com/wp-content/uploads/2022/09/RECOLLIDA-FIRMAS-SUPRESION-AUTOBUS-GUITIRIZ-BNG.jpg)
O Bloque Nacionalista Galego prosegue coa campaña de recollida de sinaturas ante o novo plan de mobilidade do Ministerio de Transportes, Mobilidade e Axenda Urbana, desta vez no Concello de Guitiriz.
O proxecto do Goberno do Estado contempla a supresión de paradas de autobús nas seguintes localidades de Lugo: Pedrafita do Cebreiro, As Nogais, Baralla, O Corgo, Guitiriz, Palas de Rei e Monterroso. Polo que a organización nacionalista defende a modificación deste plan.
Esta actividade que se desenvolveu na feira de Parga, participou o concelleiro do BNG en Guitiriz, Xosé Lois García Souto Pereira xunto coa deputada por Lugo do BNG no Parlamento galego, Olalla Rodil e militantes e simpatizantes da organización.
Olalla Rodil declarou “non se pode permitir que nos deixen sen servizos no interior do País, por isto desde o BNG esiximos o mantemento das paradas e liñas e instamos a mellorar as frecuencias e liñas”
Neste senso, a deputada subliñou “animamos a toda veciñanza das terras de Lugo a que asinen nas mesas que imos a colocar para defender un transporte de calidade, temos dereito a vivir, a traballar e a movernos polo País cun transporte do século XXI que atenda as necesidades da veciñanza”