O Buriz celebra un Magosto e Esfolla con actividades para toda a familia
A parroquia do Buriz acollerá o vindeiro 9 de novembro unha festa tradicional de Magosto e Esfolla, organizada pola Asociación As Calzadas do Buriz en colaboración co Concello de Guitiriz.
O evento comezará ás 17:00 horas cunha xornada de animación infantil a cargo de Maylandia, que se prolongará ata as 20:00 horas. Tras esta sesión para os máis pequenos, dará comezo o esperado magosto, onde se ofrecerán de balde liscos, chourizos e castañas para todos os asistentes.
A festa contará ademais coa música de DJ Señor Magick, quen animará a xornada con temas para todos os gustos. Tamén haberá concursos, sorteos e outras sorpresas para garantir unha tarde e noite chea de diversión.
Esta celebración é unha excelente oportunidade para manter vivas as tradicións locais e gozar dun día de lecer en familia e en comunidade.