O campo de tiro de Parga acollerá esta fin de semana dúas probas da Copa Galicia de tiro olímpico
O campo de tiro situado no Campamento Militar de Parga, no concello de Guitiriz, será escenario esta fin de semana da celebración de dúas probas correspondentes á Copa Galicia de tiro olímpico. O evento desenvolverase entre os días 13 e 15 de marzo e reunirá a participantes chegados de distintos puntos de Galicia.
Segundo o bando feito público polo Concello de Guitiriz, a Subdelegación do Goberno en Lugo autorizou á Federación Galega de Tiro Olímpico para o uso destas instalacións militares por parte de persoal civil co obxectivo de celebrar o campionato. As probas que se disputarán son a Copa Galicia F-Class a 600 yardas e a modalidade F-Class Produción de media distancia a 300 e 600 yardas.
A programación comezará o venres cunha xornada dedicada aos adestramentos dos participantes. A competición desenvolverase xa o sábado e o domingo, con probas tanto en horario de mañá como de tarde. O campionato concluirá o domingo arredor das 18.00 horas.
A organización do evento corre a cargo de Agarto, a Asociación Galega de Rifle e Tiro Olímpico, entidade responsable da coordinación das probas. As inscricións para participar no campionato xa están pechadas.
Desde o Concello de Guitiriz sinalan que a celebración desta cita deportiva permitirá converter durante uns días o campo de tiro de Parga nun punto de encontro para afeccionados e deportistas desta disciplina.