O CEIP Insua Bermúdez acolle a estudantes de Guimarães nun intercambio cultural do Eixo Atlántico
Vilalba foi escenario esta semana dun novo capítulo do programa de encontros escolares promovido polo Eixo Atlántico, coa chegada de 17 alumnos e alumnas da Escola de Briteiros, situada en Guimarães. Esta visita forma parte dunha iniciativa de intercambio que tamén levará ao alumnado vilalbés á cidade portuguesa nos próximos días.
Durante a súa primeira xornada en Vilalba, os estudantes portugueses tiveron a oportunidade de coñecer a tradición queixeira da comarca coa visita á queixería Don Crisanto, en Lanzós. A actividade continuou cun percorrido pola historia local, da man da Escola de Teatro de Vilalba, que lles presentou a lenda e o pasado da emblemática Torre dos Andrade.
As actividades proseguirán ao longo da semana, co obxectivo de ofrecer unha visión ampla da riqueza cultural, histórica e natural da Terra Chá. O Concello de Vilalba agradeceu a colaboración do CEIP Insua Bermúdez, da queixería Don Crisanto, do Consello Regulador da DOP San Simón da Costa, do Parador de Vilalba e da Escola de Teatro, cuxo compromiso fixo posible esta experiencia de irmandade e aprendizaxe compartida entre territorios do norte peninsular.