O Centro de Saúde de Friol organiza un obradoiro sobre vacinación no adulto
O Centro de Saúde de Friol acollerá este mércores 25 de febreiro, ás 13:30 horas, un obradoiro de educación para a saúde centrado na vacinación na idade adulta, unha actividade dirixida a informar á poboación sobre a importancia da inmunización ao longo da vida.
Durante a sesión abordaranse cuestións como a relevancia das vacinas na etapa adulta, as recomendacións existentes segundo a idade e os distintos grupos de risco, así como a desmontaxe de falsos mitos relacionados coa vacinación. A actividade será impartida polo persoal sanitario do propio centro.
O obradoiro contará cun máximo de 15 participantes, polo que as prazas son limitadas. As persoas interesadas en asistir poden formalizar a súa inscrición e obter máis información no mostrador do propio Centro de Saúde de Friol. A iniciativa está promovida polo Servizo Galego de Saúde (Sergas).