O Centro Ocupacional de Vilalba estrea novos equipos na aula de informática
![Inauguración da nova aula de informática do Centro Ocupacional.](https://terrachaxa.com/wp-content/uploads/2017/09/Inauguración-da-nova-aula-de-informática-do-Centro-Ocupacional..jpg)
O Centro Ocupacional de Vilalba estrea nova aula de informática trala incorporación de novos equipos donados pola oficina vilalbesa de la Caixa.
A directora do centro, Belén Varela, lembra que “no momento da construcción do centro, xa se habilitara unha aula de informática; pero, co seu uso, o estado dos equipos foise deteriorando ata quedar únicamente dous en funcionamento”.
Así, agradece a colaboración da Obra Social La Caixa indicando que a de informática “é unha das actividades que se desenvolven no Centro Ocupacional que máis lles gusta aos rapaces e rapazas; ademais de ser unha actividade de integración no entorno máis cercano e, sobre todo, como recurso para unha actividade colectiva e de memoria que debemos traballar coas persoas de máis idade”.
Belén Varela non pecha a posibilidade de aumentar o número de equipos; xa que “o espazo dispoñible é amplo”. Con todo, agradece a colaboración de la Caixa e agarda poder colaborar coa entidade noutros proxectos.
O Centro Ocupacional, “a xoia da coroa”
O traballo no Centro Ocupacional ten a súa recompensa. Así o cre o alcalde de Vilalba, Agustín Baamonde, que o define como “a xoia da coroa” pola súa actividade e ben social; a pesar de que supón un esforzo para o Concello.
Lembra Baamonde que este proxecto se puxo en marcha en condicións difíciles comezando a traballar na nave dos Freiros durante catro anos. Despois, “coa colaboración do Concello, a Xunta e entidades privadas, deuse un salto cualitativo ata conseguir unhas instalacións propias. Pero, o mérito correspóndelle ao pobo de Vilalba”, destaca.
O rexedor aproveita a ocasión para agradecer o traballo á directora e aos demais traballadores do centro e pon en valor o esforzo dos usuarios e usuarias por superar as súas dificultades e avanzar na mellora da súa calidade de vida.
Igualmente, agradece a colaboración de la Caixa pola posta en marcha deste sistema de ordenadores.