O Cercud de Baamonde acolleu varias concentracións de scouts
O campamento do Cercud de Baamonde convértese cada verán nun espazo de encontro clave para o movemento scout, acollendo grupos nacionais e internacionais que contribuíron a dinamizar a vida cultural e social da vila.
Durante a segunda quincena de xullo, o Grupo Scout María Auxiliadora de Cádiz, con 80 participantes, celebrou o seu 50 aniversario cunha acampada especial neste enclave natural. Medio século de historia, formación en valores e compromiso social reuniron a distintas xeracións de scouts nun ambiente de convivencia, aprendizaxe e conexión coa natureza.
Xa en agosto, o grupo alemán BdP Landesverband NRW e.V., con 170 integrantes, percorreu Galicia en pequenos grupos, visitando zonas como Ferrol, Eume, A Coruña, Betanzos e Bergantiños. O seu punto de encontro final foi Baamonde, onde compartiron os últimos días de campamento antes de regresar a Alemaña. Esta experiencia reforzou os lazos internacionais do escultismo e permitiu un enriquecedor intercambio cultural.
O campamento do Cercud, que cada ano acolle numerosos grupos scouts, consolídase como referente nacional e internacional. Neste espazo difúndense os valores naturais e culturais das Reservas da Biosfera Terras do Miño, promovendo a compatibilidade entre o turismo e a biodiversidade.
A presenza destes grupos xerou un impacto positivo na economía local e reforzou o papel de Baamonde como epicentro do intercambio cultural entre mozos e mozas de distintas rexións e países, sumándose ás innumerables nacionalidades que transitan pola área recreativa a través do Camiño Norte de Santiago, convertendo este enclave nun verdadeiro cruce de culturas e experiencias.
