O Ciclo Mestre Mateo regresa a Vilalba co mellor do cinema galego
Este xoves, 19 de xuño, o Auditorio Municipal de Vilalba acollerá a primeira sesión do Ciclo Mestre Mateo 2025, un evento que, como todos os anos, busca achegar ao público o mellor do cinema galego contemporáneo.
Nesta primeira entrega proxectaranse tres curtametraxes de imaxe real, cunha duración total aproximada dunha hora. Son Nai, do director Tito Refoxo, Véxote, dirixida por Óscar Pardo e Pura, da directora Carmen Méndez.
Este ciclo, que se celebra todos os anos en Vilalba, continuará durante o verán para proxectar os films gañadores deste certame.
A cita será ás 20:00 horas, e está organizada polo Instituto de Estudos Chairegos (Iescha) co apoio da Academia Galega do Audiovisual e o Concello de Vilalba.
Unha oportunidade única para gozar do talento audiovisual galego e apoiar o cinema feito na nosa terra.