O Cole de Parga acolle unha festa con teatro, música e castañas
O Colexio de Parga organizará este sábado 22 de novembro unha nova proposta cultural aberta a toda a comunidade. A partir das 19:30 horas, o centro escolar acollerá a función improvisada Improduccións, do ciclo de teatro amador Improductivas, unha iniciativa que combina humor, creación escénica en directo e participación do público.
A actividade inclúe tamén música, castañas asadas e diversos petiscos, coa intención de crear un ambiente acolledor co que dar a benvida ao outono. A comunidade educativa anima a asistir a todas as persoas que teñan a tarde libre e que desexen gozar dunha velada diferente no propio colexio.
O evento, promovido polo CEIP López Suárez de Parga coa colaboración da Deputación de Lugo e da ANPA, celebrarase dentro das instalacións do centro educativo coa actuación de Na Casa Zoqueiro. A organización destaca o carácter aberto da convocatoria e a vontade de fortalecer os lazos sociais e culturais da contorna a través do teatro e da convivencia.