O colectivo Euroeume bota a andar o seu proxecto audiovisual Enraizadas
![enraizadas video](https://terrachaxa.com/wp-content/uploads/2021/10/enraizadas-video.jpg)
O proxecto desenvolverase durante os vindeiros meses, contando cun acto de presentación que se levará a cabo o día 12 de novembro na Casa Dopeso en As Pontes.
Coincidindo co Día das Mulleres rurais, Euroeume saca á luz o spot da súa campaña “Enraizadas”. Enraizadas formúlase como un proxecto audiovisual de fomento do consumo responsable e de proximidade e de defensa dos valores da igualdade. A campaña está protagonizada por sete mulleres, produtoras de seis concellos distintos das comarcas do Eume e Ferrolterra, que teñen algún tipo de vinculación ao sector agroalimentario. A través destas pezas de vídeo, coñeceremos as súas traxectorias e iniciativas e os valores que as rexen, tratando de amosar como co consumo destes produtos se está a coidar da terra e das persoas que a habitan. Preténdese, ademais, poñer en valor os produtos da zona e os procesos de elaboración dos mesmos.
Á publicación do spot segueralle presentación de todas as participantes e os seus proxectos durante o mes de outubro; e a emisión de 7 pezas audiovisuais protagonizadas por mulleres do Eume e Ferrolterra durante os meses de novembro e decembro. Ademais, o 12 de novembro levarase a cabo un acto de presentación da campaña na casa Dopeso en As Pontes.
Este proxecto foi impulsado por Euroeume en colaboración con Rexenerando (Xestión e producción) e Illa Bufarda (gravación e edición), no marco da Convocatoria de Subvencións da Deputación da Coruña a entidades sen fins de lucro para o desenvolvemento de programas de políticas de igualdade de oportunidades entre mulleres e homes e loita contra a violencia de xénero no ano 2021.