O colectivo Os Meiregos busca voluntarios para organizar este ano a Baixada de Carrilanas Vila de Meira
O emocionante evento da 5ª Baixada de Carrilanas Vila de Meira está en marcha e precisa da colaboración da veciñanza para converter esta edición na máis espectacular ata o momento. A organización, Os Meiregos, fai un chamamento a todas aquelas persoas interesadas en formar parte desta aventura única, prevista para os días 14 e 15 de xuño.
Os voluntarios terán a oportunidade de vivir a baixada desde dentro, colaborando en diferentes tarefas como o control de tramos, asistencia, apoio loxístico ou outras funcións necesarias para o bo desenvolvemento do evento.
Buscan persoas con ganas de colaborar, pasalo ben e desfrutar dunha fin de semana chea de velocidade, emoción e compañeirismo. A organización destaca que será "unha experiencia inesquecible para todas e todos os participantes".
Para inscribirse ou solicitar máis información, só é preciso contactar con algún membro da directiva ou enviar unha mensaxe á organización a través das súas redes sociais.