O Concello asegura que os cambios na Pravia serán provisionais para acometer o arranxo da zona
![rua da pravia obras](https://terrachaxa.com/wp-content/uploads/2021/06/rua-da-pravia-obras.jpg)
Tras a protesta dos comerciantes da contorna da rúa da Pravia de onte, o Concello de Vilalba informou hoxe que os cambios provisionais de tráfico na rúa da Pravia son obrigados para garantir a seguridade tras o accidente acaecido nun dos inmobles desta rúa.
A alcaldesa de Vilalba, Elba Veleiro, e o concelleiro de Infraestruturas, Luis Fernández, deron esta tarde unha rolda de prensa para explicar polo miúdo o que acontece nesta zona.
Tras o derrubamento dunha vivenda hai uns días, o concello abrirá de forma provisional o tráfico nun só carril e nunha soa dirección (Lugo-Mondoñedo), baixo criterios técnicos que aconsellan que sexa así.
“Prodúxose unha situación de emerxencia tras o incendio e o derrubamento do pasado día 7 e tomamos medidas de urxencia para garantir a seguridade das persoas e tamén dos inmobles”, manifestou a alcaldesa, que insistiu en que “o único importante agora mesmo é garantir a seguridade”.
“No día de hoxe tivemos coñecemento dun informe que Espina e Delfin xa entregou ao anterior grupo de goberno no ano 2017, advertindo do mal estado das tuberías de abastecemento de auga na rúa da Pravia”, apuntou Fernández, que lamenta “a irresponsabilidade do anterior goberno de non informarnos desta situación”.
En concreto, as tubaxes de fibrocemento que configuran a rede de abastecemento da rúa foron instaladas hai más de 40 anos e teñen unha vida útil de 30-35 anos, segundo o Centro Nacional de Novas Tecnoloxías, dependente do Goberno.
En anos anteriores producíronse rebentóns, concretamente no 2013, 2015 e outro no 2017, unha sucesión de acontecementos que se recollen no informe, solicitado polo goberno actual, á empresa concesionaria. Neste documento do que tivemos hoxe coñecemento, aconséllase o cambio das tuberías no ano 2017.
“Unha situación ocultada, un feito moi grave, e agora limitamos o tráfico a unha soa dirección para evitar que as vibracións provoquen máis danos”, engade o concelleiro de Infraestruturas. Neste senso, “un dos factores que pode repercutir negativamente na rotura das tubaxes de fibrocemento é un exceso de tráfico, especialmente os vehículos pesados”.
O grupo de goberno decidiu nas últimas horas destinar unha partida de 330.000 euros do remanente municipal para a actuación que será necesaria, ademais de solicitar a colaboración doutras administracións xa que será un proxecto importante.
O concello quere “transmitir tranquilidade e confianza aos veciños e veciñas” afirmando que se tomarán as medidas oportunas coa única intención de previr riscos.
OS COMERCIANTES
Os comerciantes anunciaran anteriormente que se concentrarán e iniciarán unha serie de protestas en contra dos cambios previstos na rúa da Pravia.
Así, entre as medidas que anunciaron figuran colocar carteis nos seus negocios, concentrarse na rúa e remitirán unha carta ao Concello.
![rua da pravia vilalba rolda de prensa](https://terrachaxa.com/wp-content/uploads/thumbs/2021/06/rua-da-pravia-vilalba-rolda-de-prensa-200x104.jpg)