O Concello da Pastoriza recibe unha achega para a adquisición dun vehículo para o servizo de augas
A Xunta de Galicia destina 13.500 euros ao concello da Pastoriza para a adquisición dun vehículo para o servizo de augas municipal, que será utilizado para a realización de tarefas de control, mantemento e conservación da rede de abastecemento.
O delegado territorial da Xunta en Lugo, José Manuel Balseiro, sinalou que a Vicepresidencia e Consellería de Presidencia, Administracións Públicas e Xustiza achega o 60 por cento do orzamento do vehículo “no marco da colaboración coas facendas locais, para que os concellos poidan desenvolver as súas competencias cos medios axeitados e co menor custo posible para eles”.
Neste caso, o investimento do Goberno galego reforza o parque móbil municipal en base ás necesidades do servizo de aguas, que debe supervisar as redes de abastecemento e desprazarse aos diferentes depósitos de cabeceira, algúns de difícil acceso. Trátase dun vehículo Cross Over, que reúne as características dun turismo e a posibilidade de adoptar en determinadas situacións as vantaxes dun todoterreo.
Balseiro subliñou que o Goberno galego “aposta pola mellora das dotacións e infraestruturas municipais para que os veciños e veciñas dispoñan de servizos públicos eficaces en calquera parte do territorio”.