O Concello de Abadín recibe un novo tractor para o mantemento dos camiños municipais
O Concello de Abadín incorpora un novo tractor á súa frota de maquinaria destinada ao mantemento dos camiños municipais. A entrega do vehículo, que terá como función principal o desbroce das vías, realizouse nas instalacións do propio concello, contando coa presenza de representantes locais.
Esta adquisición foi posible grazas ao apoio financeiro da Xunta de Galicia, que subvencionou integramente o proxecto a través do Fondo de Compensación Ambiental. O tractor foi subministrado polo Taller Empalme, empresa local de Vilalba, fortalecendo así o compromiso do concello co comercio e servizos da contorna.
O Concello de Abadín reafirma, con esta nova incorporación, o seu compromiso "co medio ambiente e coa mellora dos espazos públicos, co obxectivo de garantir a seguridade e o acceso cómodo aos camiños municipais para todos os veciños e visitantes".