O Concello de Castro de Rei pon en marcha de novo o servizo madrugadores nos dous colexios
O Concello de Castro de Rei porá en marcha o servizo de madrugadores este curso nos dous centros da localidade, o de Ramón Falcón, na capitalidade, e no Veleiro Docampo, en Castro Ribeiras de Lea.
O servizo de Madrugadores consiste na ampliación do horario de apertura, durante todos os días lectivos no centro escolar. O período de execución das actividades de madrugadores iniciarase o primeiro día 11 de setembro ata o último día lectivo do mes de xuño (o servizo estará supeditado ao servizo lectivo).
As actividades de madrugadores están destinadas a nenos e nenas matriculados nese centro cuxas idades estean comprendidas entre os 3 e os 12 anos.
Realizarase de luns a venres, excepto en días non lectivos e o horario será de 8.00 a 9.15 no Ramón Falcón e de 7.30 a 9.15 no Veleiro do Campo. Atenderase aos pequenos facilitando o almorzo que podan traer da casa.
A data de inscrición está aberta ata o 4 de setembro e esta debe facerse na páxina web do concello/inicio/sede electrónica/acceso a trámites sen certificado dixital/cidadáns/cultura e deporte.