O Concello de Cospeito organiza actividades educativas polo Día Internacional da Muller
O Concello de Cospeito conmemora o Día Internacional da Muller, 8 de marzo, cunha serie de actividades destinadas aos centros educativos do municipio. O obxectivo destas iniciativas é achegar ao alumnado cuestións clave para acadar unha sociedade máis igualitaria e xusta, fomentando valores como a corresponsabilidade, a igualdade e a sororidade dun xeito lúdico e con humor.
Entre as actividades programadas destaca a narración oral Os Contos do Avó, Mulleres Galegas, que levará aos máis pequenos historias fascinantes sobre mulleres que marcaron a historia de Galicia. A través dunha mestura de humor, clown e slapstick, relataranse as vidas de figuras como Elisa e Marcela ou María Pita. Esta sesión terá lugar o 14 de marzo ás 13:00 horas no CEIP Muimenta e está dirixida ao alumnado de infantil e primaria.
Outra das propostas será Circo na Casa, un espectáculo de circo e clown que promove a igualdade de xénero a través do xogo e a imaxinación. Esta función busca concienciar sobre a importancia da colaboración nas tarefas domésticas, demostrando que poden ser divertidas e compartidas. O evento desenvolverase o 14 de marzo ás 10:30 horas no ximnasio do CPI Virxe do Monte, tamén para estudantes de infantil e primaria.
As actividades están organizadas polo Concello de Cospeito e cofinanciadas polo Pacto de Estado contra a Violencia de Xénero, reafirmando o compromiso institucional coa promoción da igualdade e a educación en valores desde a infancia.