O Concello de Friol eximirá do pago das taxas aos negocios obrigados a pechar no estado de alarma
![IMG_5553](https://terrachaxa.com/wp-content/uploads/2020/03/IMG_5553.jpg)
O alcalde de Friol, o popular José Ángel Santos, xunto co seu Equipo de Goberno decidiron eximir do pago das taxas de recollida de lixo e tratamento de residuos sólidos urbanos, durante os meses de marzo e abril, tanto na capitalidade como no rural, é dicir, a todos os afectados do termo municipal, polas medidas adoptadas polo Goberno Central, obrigándolles ao peche dos seus negocios.
Esta medida será aplicada no primeiro trimestre (mes de marzo) e no segundo trimestre (mes de abril), de maneira que non pagarán as taxas indicadas. "É unha decisión, con custo económico para as arcas municipais, pero que axudará a todos os profesionais afectados polas medidas adoptadas polo Goberno Central, debido á situación de pandemia que padecemos, a soportar mellor un período económico que se torna complicado", indicou.
Desde o Equipo de Goberno promóvese un plan de reactivación a curto e medio prazo, "con esta medida actívase un primeiro paquete de iniciativas en materia de tributos e recadación municipal destinadas a facer fronte ao impacto negativo que a situación do estado de alarma, xerado pola expansión de o COVID-19, está a provocar entre os autónomos e empresas do municipio. O programa é claro: a supresión das taxas da liquidación de lixos, consumo de auga e rede de sumidoiros".
O rexedor cre que as administracións locais, "que deben ser próximas aos problemas do día a día dos nosos veciños, debemos poñer, na medida das nosas posibilidades, todo o que estea ao noso alcance, nunha situación tan complexa como a que nos está tocando vivir.
Quero aproveitar para agradecer o bo comportamento de toda a poboación friolense na aplicación e respecto de cada unha das medidas que se foron implementando para o efecto de frear a propagación deste virus", comenta o alcalde.