O Concello de Muras activará este luns un servizo semanal de atención catastral
O Concello de Muras, en colaboración coa Deputación de Lugo, poñerá en marcha a partir deste luns, 2 de marzo, un novo servizo de atención cidadá destinado a resolver cuestións relacionadas co Catastro. A iniciativa desenvolverase ao longo de tres meses consecutivos, co obxectivo de facilitar á veciñanza a tramitación e aclaración de asuntos administrativos vinculados á información catastral.
O servizo prestarase todos os luns en horario de 9:00 a 14:00 horas nas dependencias municipais e estará atendido por un técnico especializado, que ofrecerá asesoramento personalizado e apoio na xestión de incidencias, consultas sobre titularidades, modificacións de datos ou calquera outro trámite relacionado co Catastro.
Desde o Concello subliñan que esta medida busca achegar a administración á cidadanía e evitar desprazamentos innecesarios, especialmente nun ámbito rural onde este tipo de servizos non sempre están dispoñibles de maneira permanente. As persoas interesadas poderán acudir directamente dentro do horario establecido ao longo do trimestre para recibir atención sen necesidade de cita previa.