O Concello de Rábade organiza dúas saídas ao teatro no Auditorio Gustavo Freire de Lugo
O Concello de Rábade pon en marcha unha nova iniciativa cultural coa organización de dúas saídas ao teatro no Auditorio Gustavo Freire de Lugo, co obxectivo de facilitar o acceso da veciñanza ás artes escénicas a un prezo reducido. A proposta inclúe desprazamento en autobús municipal e a asistencia ás funcións por un custo único de cinco euros.
A primeira das citas será o vindeiro 5 de febreiro, cando se representará a obra Memorias dun neno labrego, de Xosé Neira Vilas, nunha produción do Centro Dramático Galego. A función comezará ás 20.30 horas e o autobús sairá de Rábade ás 19.45 horas. O prazo de inscrición permanecerá aberto ata o 30 de xaneiro.
A segunda saída terá lugar o 26 de febreiro, tamén ás 20.30 horas, coa representación da obra Xoguetes rotos, producida por Barrosanta e Butacazero. Neste caso, as inscricións poderán realizarse ata o 13 de febreiro, mantendo o mesmo horario de saída do autobús.
Desde o Concello lembran que as prazas son limitadas, polo que as persoas interesadas deberán formalizar a súa inscrición na Área de Cultura municipal. A iniciativa busca fomentar a participación cultural e achegar propostas teatrais de calidade á veciñanza de Rábade.