O Concello de Riotorto renova a cuberta do campo de bolos de Santa Marta de Meilán
O Concello de Riotorto vén de completar unhas obras de mellora no campo de bolos de Santa Marta de Meilán, unha instalación moi utilizada polos veciños e polo Club de Bolos Cruceiro de Meilán, que é o equipo local que compite habitualmente neste espazo.
A actuación centrouse na renovación da cuberta, empregando materiais de calidade e de marcado carácter autóctono, como piares de granito, cangos de castaño e lousa do país. Ademais, instalouse un novo canlón de aluminio para mellorar a evacuación da auga e garantir así unha maior durabilidade da estrutura.
Desde o Concello explican que esta mellora responde ao compromiso de conservar as construcións tradicionais, respectando a súa estética e integrándoas na paisaxe rural.
Os traballos, ademais de asegurar a protección fronte ás inclemencias meteorolóxicas, permitirán que o Club de Bolos Cruceiro de Meilán poida continuar coa súa actividade deportiva en mellores condicións.