O Concello de Vilalba e Entrepinares presentan a programación infantil das festas
O Concello de Vilalba e o Grupo Entrepinares presentaron hoxe a programación dos días infantís das festas patronais de San Ramón e Santa María, que se celebrarán os próximos 2 e 3 de setembro na capital chairega.
As dúas xornadas contarán cunha ampla oferta de actividades gratuítas para todas as idades na Praza da Constitución, que abrirá o seu espazo infantil de 12:00 a 14:00 horas e de 16:00 a 20:00 horas.
Os nenos e nenas poderán gozar de inchables para todas as idades, simuladores, nerf battle arena, rockomonte e shotter gallery, ademais dunha merenda especial de snacks de queixo, facilitada polo Grupo Entrepinares.
Como novidade, este ano a programación reforzase cun evento destacado, o martes 2 de setembro, ás 20:00 horas, terá lugar o concerto de Uxía Lambona e a Banda Molona na Praza de Santa María.
Pola súa banda, o mércores 3 de setembro, a clausura dos días infantís estará marcada por unha festa da escuma, supeditada ás condicións meteorolóxicas da xornada.
Os días infantís enmárcanse no acordo de colaboración recentemente renovado entre o Concello de Vilalba e o Grupo Entrepinares, mediante o cal a empresa financiará diferentes actividades lúdicas e recreativas dirixidas á infancia, tanto durante as festas patronais como no Samaín e no programa de Nadal, que incluirá propostas no casco urbano e tamén nas parroquias.
A alcaldesa de Vilalba, Marta Rouco, salientou que “esta colaboración é un exemplo de como a unión entre o tecido empresarial e as institucións locais pode reforzar a vida social, cultural e festiva da nosa vila. Grazas a Entrepinares podemos ofrecer ás familias actividades de calidade, pensadas para que a infancia sexa tamén protagonista das festas patronais e doutros momentos destacados do calendario vilalbés”.
“Para nós, este patrocinio é unha maneira de devolver á sociedade parte do que recibimos dela. As festas infantís de Vilalba son un espazo no que as familias se reúnen, comparten e crean recordos, e iso ten un valor incalculable. Apoiar este tipo de iniciativas é contribuír ao benestar común e reforzar os lazos que nos unen coa comunidade”, sinalou Javier Gato, director do complexo industrial de Entrepinares en Vilalba. Así mesmo, engadiu que “acompañar ao Concello nesta celebración é tamén unha responsabilidade que asumimos con orgullo e compromiso”.