O Concello de Vilalba felicita a dúas centenarias
A alcaldesa de Vilalba, Marta Rouco, e o concelleiro Luis Fernández visitaron estes días a dúas veciñas centenarias da localidade.
Primeiro, achegáronse ata unha casa de Codesido para acompañar a Pilar Fernández na celebración do seu 101 aniversario. Por segundo ano consecutivo, compartiron con ela e a súa familia un momento entrañable, enchido de agarimo e recoñecemento á súa longa traxectoria.
A seguinte vez foi no Hospital Asilo, onde felicitaron a Julia García, que cumpriu 102 anos. Julia recibiu á alcaldesa e ao concelleiro cun gran sorriso, demostrando unha vez máis a súa vitalidade e alegría. A homenaxe incluíu a entrega dun ramo de flores e un afectuoso reencontro que encheu de emoción a todos os presentes.
Desde o Concello, quixeron destacar a importancia de compartir estes momentos coa veciñanza e de recoñecer a historia de vida das persoas maiores da vila.