O Concello de Vilalba implanta unha canle de comunicación coa veciñanza a través de Whatsapp

As iniciativas municipais, a axenda de actividades, as convocatorias para veciños e familias, e os avisos urxentes son algunhas das novas que se enviarán por mensaxe

Unha imaxe do Whatsapp de Vilalba

A Alcaldía de Vilalba pon en marcha un novo servizo de información municipal vía Whatsapp. Así, a veciñanza disporá dunha nova canle de comunicación que lle permitirá estar informada de todo o que ocorre no concello a través do seu móbil e de xeito instantáneo.

Con este novo servizo, os veciños e veciñas poderán coñecer as últimas novidades sobre a actividade municipal, a axenda, obras, convocatorias, avisos urxentes e outras noticias e informacións de interese.

“Con esta nova canle, damos un novo paso para axilizar, dinamizar e garantir unha correcta información aos veciños e veciñas”, explica a alcaldesa de Vilalba, Marta Rouco.

O servizo consiste nunha lista de difusión, non é un grupo no servizo de mensaxería, polo que os usuarios non terán acceso aos datos ou información do resto dos rexistrados/as na canle de WhatsApp.

Para acceder a esta canle de Whatsapp da Alcaldía de Vilalba, só hai que agregar á axenda de contactos o número teléfono 648 199 486 e enviar unha mensaxe coa palabra ALTA.

Este novo servizo entrará en funcionamento o xoves, 6 de xuño.