O Concello de Vilalba triplica o gasto por habitante das sete grandes cidades para o SAF
O Concello de Vilalba aprobou hai uns días un orzamento municipal para o ano 2025 de 13.366.085 euros, dos que destinará máis do 25% ao Servizo de Axuda no Fogar (SAF).
Esta aposta do concello por un servizo “prioritario dentro da nosa acción de goberno” supón que Vilalba triplique o gasto por habitante das sete grandes ciudades galegas na Axuda no Fogar.
No caso de Vilalba, o gasto por habitante é de 240 euros anuais, polos 75 euros de media das sete cidades: 88 euros en Lugo; 85 euros en Santiago; 51 euros na Coruña; 107,6 euros en Ferrol; 60 euros en Pontevedra; 56 euros en Vigo, e 48 euros en Ourense.
“Os maiores e dependentes merecen toda a nosa atención, é unha aposta clara por parte do goberno local, pero os datos son moi chamativos, reflicten unha situación que asfixia ao concello e deberían servir para unha reflexión conxunta”, explica a alcaldesa, Marta Rouco.
Facendo referencia ao investimento total, só a capital, Lugo, supera na provincia os 3,4 millóns de Vilalba.
O servizo conta en Vilalba con máis de 140 traballadores e atende a máis de 310 veciños e veciñas do concello (unhas 14.700 horas mensuais).
“Os concellos asumimos esta competencia impropia sen contar co financiamento necesario, se non chega de forma urxente máis axuda da Xunta de Galicia e o Goberno, a situación será moi complicada”, remata Rouco.