Enviado a ADIF o escrito de obxección á supresión dos pasos a nivel en Parga
A solicitude vai acompañada de 94 sinaturas de veciños e veciñas de Parga que apoian esta petición.. Marisol Morandeira agarda “unha pronta resposta” e lembra que “de todos modos pedimos que si se realicen actualizacións no sistema de seguridade dos pasos a nivel”.
O Concello de Guitiriz enviou hoxe a ADIF o escrito de obxección para que non execute ningún proxecto de supresión dos pasos a nivel en Parga ata que se conte coa aprobación veciñal e institucional.
Polo momento esta aprobación non existe xa que a solicitude vai acompañada dun total de 94 sinaturas de veciños e veciñas de Parga que apoian esta petición, que foron recollidas na reunión celebrada o pasado 16 de xuño no pavillón do CEIP Santo Estevo e na casa consistorial, onde o documento estivo exposto ata o 23 de xuño.
Nese encontro consensuouse coa veciñanza o escrito que hoxe o Concello lle envía ao Administrador de Infraestructuras Ferroviarias despois de acadar o compromiso de ADIF de non executar o citado proxecto de supresión dos pasos a nivel se non existía un ambiente favorable.
“Tal e como está configurado Parga urbanística e socialmente a mellor alternativa é a construción dunha variante pero, sabendo que actualmente ADIF non contempla esta posibilidade e coñecidas as posibilidades reais actuais, o mellor é manter os pasos a niveis existentes”, incidiu a alcaldesa de Guitiriz, Marisol Morandeira.
A rexedora agarda “unha pronta resposta” e lembra que “de todos modos pedimos que si se realicen actualizacións no sistema de seguridade dos pasos a nivel, incorporando as novas tecnoloxías”.
BNG
Por outra banda, o deputado do BNG no Congreso, Néstor Rego, rexistra na cámara baixa iniciativas reclamando a ADIF que desbote o proxecto no que propón o soterramento dos tres pasos a nivel no núcleo de Parga, Concello de Guitiriz, para que desde o Ministerio se aborde a redacción dun novo proxecto para construír unha variante exterior. A proposta da formación nacionalista recolle as demandas dos veciños e veciñas e conseguiría sacar o tren do centro da vila e, polo tanto, melloraría a calidade de vida e o desenvolvemento económico.
"O proxecto que eliminaría os tres pasos a nivel do centro urbano de Parga non convence nin á veciñanza, nin ao equipo de Goberno, nin á formación nacionalista", di. O deputado do BNG visitou Parga para escoitar á veciñanza e as súas demandas sobre o proxecto de soterramento dos tres pasos a nivel que atravesan o centro da vila. Desde 1875 esta poboación tivo que sufrir as molestias que causa e, sobre todo, o perigo de accidentes tanto para os vehículos como para as e os peóns que deben atravesar diariamente para cruzar dun lado a outro do centro urbano.
“Co proxecto que formula ADIF, a división de Parga veríase acentuada xa que propón a construción dunha vía subterránea, para vehículos e peóns, á altura do paso central e a substitución dos outros dous pasos a nivel por pasos peonís tamén inferiores, construíndo un muro para impedir o acceso ás vías na superficie” explica Rego.
A solución proposta non só “dificultaría ou impediría totalmente a comunicación entre ambas as partes de Parga”, senón que tamén “afectaría directamente a unha das súas principais fontes de ingresos e de dinamización económica”, as dúas feiras mensuais, que serían moi difíciles de manter co proxecto previsto.
“É necesario eliminar os pasos a nivel, pero non a calquera prezo, debe desenvolverse un proxecto que permita garantir a seguridade viaria en Parga, pero non pode sacrificarse o futuro desta localidade para conseguilo” enfatiza Rego. Neste sentido, a proposta dos veciños e veciñas, que tamén é defendida polo BNG, é a “construción dunha variante para sacar a vía férrea do centro de Parga. Sería necesario modificar o trazado da Ponte da Retorta por pola parte norte de Parga e conectar de novo coa vía actual en Recemil”.
Esta opción non só conseguiría evitar a división do núcleo en dous, senón que liberaría os terreos ocupados pola vía no centro que poderían ser destinados a usos públicos, o que serviría para a mellora da calidade de vida e como revulsivo económico de Parga.
Recentemente, desde a iniciativa Parga non se vende, presentaron outra proposta de variante, elaborada polo equipo de infraestruturas da Universidade de Santiago de Compostela do campus de Lugo, outra alternativa que lograría o obxectivo de non dividir en dous Parga. “A veciñanza quere que o tren siga pasando polo concello, Guitiriz debe ter unha liña ferroviaria útil e proveitosa, que permita a conexión de persoas e empresas e, para iso, é necesario un trazado adaptado ás necesidades do século XXI, que axude ao desenvolvemento económico de Guitiriz e de toda a comarca” reivindica Néstor Rego.