O Concello inicia as obras de acondicionamento da nova ruta Pastoriza Mar Verde
O Concello da Pastoriza deu comezo ás obras de dinamización dunha nova ruta de sendeirismo denominada Pastoriza Mar Verde, que partirá da vila e percorrerá distintas localizacións como Saldanxe, Crecente e o Castro de Saa en Baltar. Esta iniciativa, financiada integramente pola Xunta de Galicia cun investimento superior aos 29.000 euros, busca fomentar o turismo e poñer en valor o patrimonio cultural da zona.
As obras teñen un prazo de execución dun mes e pretende converterse nun atractivo tanto para visitantes como para a propia veciñanza, ofrecendo unha experiencia que combina natureza, cultura e historia local.
A ruta, de 9,5 quilómetros de lonxitude e cun nivel de dificultade medio-baixo, iniciará o seu percorrido na Barreira da Pastoriza, preto do lugar onde se construirá unha área de caravanas para atraer visitantes. O itinerario atravesará o centro da vila, permitindo que os camiñantes poidan facer unha pausa para tomar un café ou realizar compras, favorecendo así o comercio local.
A continuación, o traxecto levará ata Saldanxe, onde se poderá visitar unha capela e unha antiga ponte, pasando tamén xunto á piscifactoría da zona. Posteriormente, a ruta proseguirá cara a Baltar, onde se atopa outra capela, finalizando no emblemático Castro de Saa.