O Concello vilalbés limpa a estación de autobuses "logo que a Xunta non o fixera", di Rouco
O Concello de Vilalba vén de acometer a limpeza e o acondicionamento do recinto da estación de autobuses da capital chairega logo de que a Xunta de Galicia desatendera a petición feita pola alcaldesa, Marta Rouco, en reiteradas ocasións.
“Levo un ano e medio insistindo nunha solución para a infraestrutura e enviamos varios requirimentos á dirección xeral de mobilidade para que se acondicionara o recinto, chegados a este punto non podiamos deixar que seguira no estado de abandono no que se atopaba” asegura Rouco.
Nesa liña, a rexedora vilalbesa engade que “este mes de abril a nosa vila ten un alto nivel de actividade, comezando esta fin de semana coa celebración da Festa do queixo San Simón da Costa e rematando co FIV, polo que non podiamos continuar con esa imaxe de abandono e insalubridade nunha das portas de entrada ao noso municipio”.
En consecuencia, o Concello de Vilalba encargouse da limpeza de vexetación, que levaba meses sen cortar, así como da recollida dos residuos que se atopaban espallados polo recinto da estación de autobuses, a limpeza das dársenas e do acceso principal ás mesmas.
“Tal e como me comprometín, dende o goberno local non imos ser cómplices da teima da Xunta de Galicia en abandonar a Vilalba e aos vilalbeses, polo que actuaremos cando sexa necesario” salientou a alcaldesa de Vilalba, Marta Rouco.
Ademais, Rouco explicou que “a situación é límite pero non nos cansaremos de loitar polo que é de recibo para a nosa vila e para os nosos veciños e veciñas, unha estación de autobuses en condicións”.
Nese sentido, a rexedora vilalbesa afirmou que “seguiremos insistindo para que a dirección xeral de mobilidade desbloquee a situación da nosa estación de autobuses”.
Dende o Concello de Vilalba propoñen manter as dársenas actuais, de forma que todas as empresas de autobuses acudan a elas para deixar e recoller pasaxeiros, instalar nesa mesma zona unha infraestrutura que permita aos viaxeiros resgardarse mentres agardan, habilitar un acceso aos baños da estación e acondicionar a contorna.
Pola súa banda, tamén consideran fundamental que se instale algún panel informativo para que os pasaxeiros poidan consultar as rutas, “cando menos saber a que horas chegan ou saen os autobuses e onde conseguir os billetes”, concluíu a alcaldesa, Marta Rouco.