O Desfile de Carnaval de Riotorto 2026 repartirá máis de 5.000 euros en premios
Riotorto xa se prepara para unha das xornadas máis destacadas do Entroido coa celebración do Desfile de Carnaval 2026, que terá lugar o sábado 7 de febreiro e que converterá as rúas do municipio nun espectáculo de cor, música e imaxinación. O desfile partirá ás 17.30 horas desde a Casa da Cultura e percorrerá o centro da vila ata rematar no pavillón polideportivo.
A organización destinará máis de 5.000 euros en premios, repartidos entre as diferentes categorías infantil e adulta, tanto en modalidades individuais como en parellas e grupos. Ademais, tamén se establecen importantes galardóns para carrozas, charangas e comparsas, con premios que alcanzan os 600 euros no caso das comparsas máis numerosas, e ata 360 euros para carrozas.
Na categoría adulta, os premios individuais chegarán ata os 150 euros, mentres que en parellas se repartirán ata 200 euros. Nos grupos, as contías varían segundo o número de integrantes, cun primeiro premio de 350 euros para grupos de máis de dez persoas. No apartado infantil, os premios oscilarán entre os 50 e os 250 euros, segundo a modalidade.
As inscricións poderán realizarse ata o venres 6 de febreiro a través do correo electrónico riotortocf@gmail.com ou o propio día do desfile na Casa da Cultura, entre as 12.00 e as 17.00 horas. A entrega de dorsais efectuarase ás 17.15 horas.
O xurado valorará aspectos como a orixinalidade, o deseño, a creatividade, a posta en escena e a interpretación ao longo do percorrido. A entrega de premios está prevista para as 23.30 horas no pavillón polideportivo, onde haberá tamén servizo de bar e comidas, con menús especiais para os participantes.
O evento está organizado polo Concello de Riotorto e Riotorto C.F., que animan á participación nun desfile pensado para todos os públicos e para vivir o Entroido como unha gran festa colectiva.