O Día da Bicicleta en Vilalba, unha xornada de deporte e convivencia
Vilalba quenta motores para as festas patronais de San Ramón e Santa María cunha das citas máis esperadas e consolidadas do verán: a Festa da Bicicleta, que este ano celebra a súa vixésima novena edición o venres 29 de agosto, xusto o día anterior ao pregón que dará inicio oficial ao programa festivo.
A Praza da Constitución será o punto de encontro para ciclistas e patinadores de todas as idades, que partirán ás 19:30 horas para percorrer as principais rúas da vila. A saída estará situada na rúa Basanta Silva, á altura do templete da música, e dende alí o pelotón avanzará cara á rúa da Pravia, Campo de Puente, rúa de Muras, rúa de Cospeito, avenida Terra Chá, Xosé María Chao Ledo, rúa de Galicia e Praza Suso Gayoso, antes de regresar á Praza da Constitución, onde estará situada a meta.
A organización entregará a cada participante un dorsal e un boleto numerado no momento da inscrición, que permitirá entrar no sorteo de diferentes agasallos ao rematar o percorrido. Entre os premios destacan unha bicicleta, unha televisión de 32 polgadas, un bono en prendas deportivas, un par de patíns, mochilas, un casco de ciclista e dous queixos de San Simón da Costa. Haberá tamén trofeo especial para o participante de maior idade.
Como cada ano, a Festa da Bicicleta mantén o seu carácter solidario baixo o lema “Somos un gran equipo! 1 bici = 1 kg. Colabora!”, co que se anima á cidadanía a achegar alimentos non perecedoiros.
As inscricións poderán realizarse no Espazo Xove de Vilalba, na rúa Novo Cazón, ata o 29 de agosto en horario de 18:00 a 21:00 horas. Tamén se permitirá anotarse o mesmo día do evento ata dúas horas antes da saída. A participación é libre e sen límite de idade, aínda que a inscrición será obrigatoria para entrar no sorteo dos agasallos.
Unha vez rematado o percorrido, a música tomará o relevo coa actuación do grupo Mario Colomán & The Clocks Band, prevista para as 21:30 horas no templete da Praza da Constitución. Esta banda emerxente do sur de Lugo chega a Vilalba con forza e ilusión, ofrecendo un directo cheo de rock, emoción e temas propios que se combinan con versións míticas.
Como é habitual, o evento terá tamén un marcado carácter solidario. Así, nesta edición recadaranse produtos para o Banco de Alimentos e porase á venda unha camiseta conmemorativa da xornada en homenaxe ao Dj e produtor vilalbés Juan Manuel Filgueiras Rama, máis coñecido como Lelé, gran afeccionado ao ciclismo que faleceu o pasado mes de abril. Os fondos recadados destinaranse integramente á Asociación contra o cancro de Lugo.
A organización da Festa da Bicicleta corre a cargo do Espazo Xove da Xunta de Galicia e conta coa colaboración do Concello de Vilalba, a Policía Municipal, Protección Civil, a Garda Civil, a Comisión de Festas e distintas entidades locais.
Deste xeito, a xornada do 29 de agosto converterase nunha celebración do deporte e da convivencia, que serve de antesala ao pregón e ao inicio oficial das festas grandes de Vilalba.
A organización lembra que como todos os anos, están invitados a participar non só as bicicletas senón calquera tipo de transporte de dúas ou catro rodas impulsado polo ser humano, polo que caben no saco tamén patinetes e mesmo coches de bebés.
A organización espera que este ano a Festa da Bicicleta volva reunir, como nas edicións anteriores, xentes da vila e arredores de todas as idades e condicións nun ambiente saudable e no que se pon en valor o ambiente festivo antes que a competición. Se o tempo acompaña, a cita poderá reunir a centos de persoas, como sucedeu en anos precedentes.
O día chegará ao seu final, ás 22.00 horas coa actuación de A Banda da Loba.