O Fendetestas fará unha xuntanza de rugby feminino nas Pontes
O equipo feminino do CR Fendetestas celebrará o sábado 21 de decembro unha xuntanza con motivo do 30 aniversario da súa creación, na tempada 2024/2025. O evento busca reunir a todas as mulleres que formaron ou forman parte da historia do club, nunha xornada de convivencia, lembranzas e celebración.
A partir das 11:00 horas, terá lugar unha tocata de rugby, unha modalidade lúdica e accesible apta para todas as idades, condicións físicas e capacidades, na que tamén participará o equipo Mixed Ability do CR Fendetestas. A actividade servirá como punto de encontro para compartir experiencias e fomentar a transferencia de coñecemento tanto sobre o deporte como sobre a vida.
A xornada finalizará cun tradicional terceiro tempo, no que as participantes terán a oportunidade de rememorar vivencias e anécdotas que marcaron o seu paso polo club. Esta iniciativa busca recoñecer o legado do equipo feminino do CR Fendetestas e reforzar os lazos entre todas as xeracións que contribuíron ao seu desenvolvemento.