O Festival 27373 regresa ao Club Fluvial de Begonte o 9 de agosto
O vindeiro 9 de agosto celebrarase no Club Fluvial de Begonte a 13ª edición do Festival 27373, unha cita xa consolidada no calendario cultural do verán lucense. Cunha combinación única de música, natureza e actividades para todas as idades, o evento volverá converter o espazo natural nun escenario vibrante e participativo.
O festival arrincará ás 13:45 coa sesión vermú amenizada por Aloumiña e Axeigo, e continuará pola tarde con xogos tradicionais como o aberto de billarda ás 17:00 e o campionato de cimbrón ás 18:00. Ás 18:30, será a quenda do teatro da man de Migallas Teatro, achegando unha proposta escénica para toda a familia.
A programación musical encherá a noite coas actuacións de Bouba Pandeireteiras, Funámbula e os Ceos Quebradizos, Punk’on Keixo e Os Residuos Atractivas, bandas que ofrecerán estilos diversos pero cun denominador común: a aposta pola música en galego e a cultura alternativa.
O festival conta con entrada de balde e campamento libre, promovendo así un ambiente aberto, sostible e accesible. A organización corre a cargo de Castiñeiro Milenario e conta co patrocinio da Deputación de Lugo, o Concello de Begonte e a Xunta de Galicia, así como coa colaboración do Club Fluvial de Begonte e outras entidades locais.
Unha nova edición que promete consolidar o espírito festivo e reivindicativo desta cita, que mestura tradición, vangarda e compromiso co territorio.