O FSF Castro organiza a próxima semana un campus para nenos
O Pavillón Municipal de Castro Ribeiras de Lea acollerá do 1 ao 5 de setembro unha nova edición do Campus FSF Castro, unha iniciativa dirixida a nenos e nenas nados entre 2011 e 2019 que busca combinar deporte e lecer durante as vacacións. O campus desenvolverase en horario de 9:00 a 14:00 horas, aínda que se ofrece a posibilidade de madrugadores desde as 8:00 horas cun custe adicional de 10 euros.
A programación inclúe actividades deportivas con adestramentos de tecnificación, dinámicas de grupo e asistencia a sesións con adestradores de Primeira División. Ademais, haberá propostas de lecer como saídas á piscina municipal, a un parque acuático ou a Diver Jump, co obxectivo de ofrecer unha experiencia variada e entretida para todos os participantes.
As inscricións estarán abertas ata o 27 de agosto. O prezo para as nenas e nenos do club é de 50 euros, cunha redución progresiva para irmáns, mentres que a tarifa xeral é de 60 euros, tamén con descontos no caso de máis dun irmán.
Desde a organización destacan que o campus é unha oportunidade para aprender, convivir e desfrutar do deporte en equipo, ao tempo que se fomentan valores como a amizade, o compañeirismo e o esforzo.