O Goberno e o Concello de Guitiriz fortalecen a cooperación institucional
A subdelegada do Goberno en Lugo, Olimpia López, mantivo este martes unha reunión coa alcaldesa de Guitiriz, Marisol Morandeira, para avanzar nas liñas de colaboración entre ambas administracións.
Durante o encontro, abordáronse diversos asuntos de competencia estatal no municipio, como o estado das infraestruturas, a seguridade viaria, o despregue da fibra óptica e a conectividade dixital, así como o impulso de programas de emprego e formación dependentes da Administración Xeral do Estado.
López destacou o compromiso do Goberno coa vertebración territorial e o desenvolvemento equilibrado da provincia, subliñando a importancia do diálogo directo cos concellos “para coñecer de primeira man as necesidades do territorio e facer máis eficaces as políticas públicas”.
Entre as actuacións recentes no municipio, a subdelegada salientou a publicación no Boletín Oficial do Estado do convenio entre o Ministerio de Educación, Formación Profesional e Deportes e o Concello de Guitiriz para a posta en marcha da Aula Mentor, un programa de formación aberta e flexible destinado a persoas adultas, que ofrece cursos en liña con titoría personalizada e certificación oficial.