O góspel chega a Meira en decembro cun concerto solidario
A vila de Meira acollerá o vindeiro 4 de decembro, ás 20:00 horas, unha noite de góspel solidaria protagonizada polo grupo Aba Taano, un conxunto formado por cinco voces de Uganda que revolucionaron o góspel africano en Europa.
O concerto celebrarase na Igrexa de Meira e ten un carácter benéfico, a favor da organización Música para Salvar Vidas, que traballa para ofrecer oportunidades de futuro a nenos e mozos en Uganda a través da música e da educación.
As entradas teñen un prezo de 12 euros e poden adquirirse na Oficina de Turismo de Meira, na plataforma giglon.com ou directamente na taquilla, unha hora antes do comezo do espectáculo.
O evento promete unha noite chea de emoción, talento e solidariedade, combinando a forza da música góspel coa causa humanitaria que representa o proxecto Música para Salvar Vidas.