O grupo Asubíiños celebra o seu V aniversario cun festival de fin de curso en Cospeito
O grupo Asubíiños celebrará o seu festival de fin de curso o vindeiro venres 20 de xuño de 2025, ás 20:30 horas, na Casa da Cultura da Feira do Monte, en Cospeito. A cita terá un carácter especial, pois coincidirá co V aniversario do grupo, e contará coa participación dunha artista sorpresa, cuxo nome se manterá en segredo ata o día do evento.
A entrada será totalmente gratuíta ata completar aforo, polo que se agarda unha gran asistencia de público para acompañar ao grupo nesta data tan sinalada. A organización do evento corre a cargo de Cousas Nosas, coa colaboración do Concello de Cospeito.
Desde a organización animan á veciñanza e a persoas de toda a contorna a achegarse para gozar dunha noite chea de música, celebración e emoción, na que se porán en valor o traballo e a ilusión dun grupo que leva cinco anos promovendo a cultura e o talento local.