O Iescha presenta o logotipo conmemorativo do seu 25º aniversario, deseñado por Xurxo Insua
O Instituto de Estudos Chairegos (Iescha) celebrou recentemente a presentación oficial do logotipo conmemorativo do seu 25º aniversario, unha peza gráfica que sintetiza o espírito e a traxectoria da entidade ao longo deste cuarto de século. A autoría do deseño correu a cargo do deseñador vilalbés Xurxo Insua, quen soubo plasmar coa súa linguaxe visual a esencia dunha institución que leva 25 anos traballando pola defensa da cultura, da lingua e do patrimonio galego.
Fundado hai un cuarto de século cun soño común —preservar, promover e celebrar a riqueza cultural galega—, o Iescha mantén hoxe, 25 anos despois, a mesma paixón e compromiso que motivaron a súa creación. Para conmemorar esta efeméride, encargouse un novo logotipo que, en palabras do propio Insua, “ten como referente a linguaxe tipográfica do logo orixinal do Iescha, de inspiración sargadeliana, no que as letras do nome compoñíanse en anagrama nun bloque vertical. É unha proposta que prima a simplicidade e unha certa elegancia, mantendo a coherencia coa identidade do Instituto”.
O resultado é unha imaxe que entrelaza tradición e modernidade, un símbolo que rende homenaxe ás múltiples actividades desenvolvidas ao longo destes anos: concertos, conferencias, debates, cinema, teatro, premios literarios, xornadas, publicacións, presentacións de libros, rutas, certames de pintura, exposicións, conmemoracións e homenaxes. Todas elas cun mesmo obxectivo común: difundir e apoiar a cultura galega e poñer en valor o noso patrimonio material e inmaterial.
Este 25º aniversario representa tamén o froito dun traballo colectivo, sustentado por persoas, entidades e institucións que, ao longo dos anos, colaboraron e apostaron pola visión do Iescha. Grazas a elas, hoxe podemos celebrar un legado vivo, dinámico e en constante crecemento.
O camiño continúa, e faino con renovadas enerxías, porque a cultura galega non é só herdanza: é tamén futuro.