O Iescha volve reclamar o nome de Manuel María para a casa da cultura vilalbesa
![SALETA GOY MANUEL MARIA](https://terrachaxa.com/wp-content/uploads/2022/09/SALETA-GOY-MANUEL-MARIA.jpg)
Hai 20 anos, un 15 de febreiro de 2003, a Real Academia Galega celebraba sesión extraordinaria pública de recepción como membro numerario de Manuel María Fernández Teixeiro. O acto, lembremos, levouse a cabo no Auditorio Municipal de Vilalba por expreso desexo do propio Manuel María, e no que o Iescha participou activamente.
Hoxe, vinte anos despois, o Instituto de Estudos Chairegos quere conmemorar dita efeméride co envío á alcaldesa do Concello de Vilalba do escrito que reflicte a continuación e no que solicitan, unha vez máis, que definitivamente a casa da cultura de Vilalba leve o nome de Manuel María.
“O Instituto de Estudos Chairegos, ao abeiro da ordenanza núm. 50 (Regulamento Especial de Honras, Distincións e Protocolo Cerimonial do Concello de Vilalba), co gallo da celebración do vixésimo aniversario do nomeamento e da recepción de Manuel María Fernández Teixeiro como membro numerario da Real Academia Galega:
CONSIDERANDO a fonda relación que Manuel María mantivo sempre con Vilalba, tanto no plano persoal canto na súa faceta literaria, dedicando unha parte da súa obra á capital chairega e á súa riqueza patrimonial, paisaxística, gastronómica, sociolóxica, poética, etc.
CONSIDERANDO que Manuel María é o valedor por excelencia da nosa bisbarra, á que cantou na súa maxistral obra "Terra Chá", e unha das fguras máis sobranceiras das letras galegas da segunda metade do século XX.
CONSIDERANDO que a traxectoria de Manuel María, a súa categoría moral e persoal, a súa signifcación no eido cultural, o seu vencello con Galiza, coa Chaira e con Vilalba, fano merecente, tal que regula a norma, “do agradecemento e da gratitude” do pobo vilalbés en recoñecemento ao seu compromiso coa Terra, coa Lingua e coa Cultura do noso país.
CONSIDERANDO que corresponde á institución municipal, representante legal da totalidade da veciñanza, a responsabilidade da distinción e que sería unha boa mostra de correspondencia co bardo chairego por canto deixou acreditado.
REITERA as peticións realizadas ao Concello de Vilalba dende hai xa dúas décadas para que a CASA DA CULTURA da nosa vila perpetúe o nome de MANUEL MARÍA.”