“O mellor dunha historia é que atrape a quen a le”
Fai uns meses o pontés de adopción Benigno Durán Novo deu o salto á literatura coa publicación de Guardián. Este vilalbés de nacemento, nútrese da súa profesión, a psicoloxía, e da súa experiencia vital para enganchar ao lector nunha trama de misterio.
Esta é a súa primeira incursión como escritor. Como xurdiu a idea?
A idea de Guardián xurdiu case como un murmurio. Unha historia que levaba tempo latindo na miña cabeza, esperando o momento axeitado para saír á luz. Sempre me fascinou o misterio, os segredos que permanecen ocultos baixo a aparencia da normalidade, e un día ocorréuseme: e se houbera algo moi antigo e fascinante agochado nun lugar insospeitado para todos nos?
Canto tempo lle levou escribila?
Máis do que pensaba e menos do que temía. O proceso foi unha viaxe intensa, chea de descubrimentos, onde a historia foi tomando forma pouco a pouco. O tempo exacto? Digamos que foi necesario un ano para que cada segredo atopara o seu lugar.
Fálenos un pouco do que atoparemos na novela Guardián.
Guardián é unha historia de misterio e investigación, cun segredo que leva séculos soterrado. Os protagonistas enfróntanse a unha verdade incómoda: Descubrir que hai detrás dunha serie de sucesos inexplicables que ocorren diante dos seus ollos. Un segredo milenario, un pasado inquedante e unha loita entre a ética e o poder conforman o fío da trama que, espero, manterá ao lector en tensión ata a última páxina.
Onde se está vendendo e que aceptación ten?
A novela pode atoparse tanto en librarías físicas coma en plataformas dixitais. Encontrarémola dende El Corte Inglés, FNAC, Amazón, e dende logo, na librería de confianza de cada un de nos, tamén en infinidade de librarías on line. A acollida está sendo moi boa, o que é unha gran satisfacción para min. Os lectores coméntanme que lles custa deixar o libro, que senten esa necesidade de saber máis, de resolver o enigma. Os adxectivos que máis me repiten son: aditiva e sorprendente. Iso é o mellor que lle pode pasar a unha historia: que atrape a quen a le.
Xa está traballando nun novo proxecto?
Os personaxes non calan, seguen falando na miña cabeza. Así que si, xa estou inmerso nunha nova historia, pero, como en todo misterio, aínda non podo contar demasiado... só direi que hai segredos que non deberían ver a luz.
Cal foi a fonte de inspiración? De que se nutre para crear os personaxes e as historias?
A realidade é sempre un bo punto de partida. A historia está chea de feitos esquecidos, de decisións cuestionables que marcaron o futuro sen que nós o soubésemos. Ademais, inspíranme os espazos con historia, os lugares que gardan sombras no seu pasado. No caso de Guardián, esas sombras convertéronse en algo máis real do que ninguén podería imaxinar.
Se lemos o libro, paseamos por Vilalba?
Si, de xeito literal. Creo que cada recuncho desta vila esconde un misterio. Pero tamén está no espírito da historia. Hai paisaxes, atmosferas e sensacións que seguramente resulten familiares. Sempre levo comigo os lugares que me marcaron dalgunha maneira, e creo que iso se nota na novela. Vilalba, máis que o lugar onde transcorre a acción é un protagonista máis da historia.
Atópase tamén algún perfil autobiográfico?
Cada escritor deixa algo de si mesmo no que escribe, aínda que non sempre de forma evidente. Non hai un personaxe que sexa “eu”, pero si hai pensamentos, inquedanzas e preguntas que forman parte da miña propia visión do mundo.
A súa profesión como psicólogo e tamén a súa experiencia en Endesa achegaron algo a esta novela?
Sen dúbida. A psicoloxía axúdame a comprender as motivacións dos personaxes, a construír persoas reais con luces e sombras. A experiencia profesional tamén me deu un ollo analítico e unha curiosidade insaciable polos procesos que a maioría da xente non ve. Iso impregna a historia, porque Guardián trata, en definitiva, sobre o que se oculta detrás do que damos por feito.
É complicado entrar no mundo da literatura e vivir disto?
Non é doado, pero tampouco imposible. A clave está en escribir porque non podes evitar facelo, porque hai unha historia que necesitas contar. Se esa paixón chega aos lectores, entón paga a pena cada esforzo. No meu caso tiven a enorme sorte de atopar unha editorial que apostou por min, trátase de Loto Azul Editorial, de Valencia.
Cal é o proxecto máis inmediato?
Seguir escribindo. A historia non remata con Guardián; hai fíos que levan a novas preguntas. O misterio non se esgota... e eu tampouco.