O mítico Juan Corbalán ofrecerá unha charla en Riotorto sobre saúde, deporte e empresa
Este sábado 3 de maio, ás 19:00 horas, o Centro Sociocultural Avelino Díaz das Rodrigas, en Riotorto, acollerá unha charla moi especial a cargo do doutor Juan Corbalán, histórico xogador de baloncesto e mítico base do Real Madrid.
Baixo o título Saúde, Deporte e Empresa, Corbalán reflexionará sobre como os valores do deporte —como o traballo en equipo, a superación, o respecto e a cooperación— poden mellorar o benestar das persoas e contribuír a un bo ambiente laboral, ademais de impulsar a produtividade nun mundo empresarial cada vez máis competitivo.
Esta visita do doutor Corbalán, que tamén é médico especializado en medicina deportiva, responde á invitación dunha riotortega da diáspora. O evento está organizado polo Concello de Riotorto e conta coa colaboración da Xunta de Galicia.
A cita será na Casa da Cultura Avelino Díaz, situada na rúa Circunvalación, 27, en Riotorto, e está aberta a todo o público interesado.