Actualidade

A recoñecida plataforma de mapeo de arte urbana Street Art Cities recopila mensualmente os mellores murais do mundo.

A recoñecida plataforma de mapeo de arte urbana Street Art Cities recopila mensualmente os mellores murais do mundo. Esta plataforma é considerada a comunidade de arte urbana máis importante a nivel internacional, e a finais do mes de setembro, publicaron os que serían os mellores murais para este mes, atopándose entre eles a obra realizada polo artista galego Nove Noel para o proxecto municipal As Ponte enPezas.
A peza mural dedicada ao considerado como o último fuxitivo e bandoleiro romántico, Mamed Casanova (apodado como Toribio), realizouse entre os meses de agosto e setembro en pleno centro da vila das Pontes, concretamente nun lateral do grupo de vivendas Calvo Sotelo, na popular Praza do Carmen.
A obra muralística é unha interpretación gráfica deste antiheroe que viviu en Galicia a cabalo dos séculos XIX e XX, nado na parroquia das Grañas do Sor (Mañón) e apresado pola Garda Civil na parroquia do Freixo (As Pontes). Toribio conquistou na súa época a literatos da talla de Valle-Inclán ou a Condesa Emilia Pardo Bazán, e aínda segue tendo gran sona na actualidade.
O mural do As Pontes enPezas retrata a Mamed nunha das súas primeiras aventuras delitivas e das máis afamadas. Todo comeza cando un veciño adiñeirado regresa da Habana e poucos días despois da súa chegada, falece e é enterrado cun fermoso traxe confeccionado en Cuba. Toribio encaprichouse coas roupas do defunto, e non tivo reparos en desenterrar o cadáver e enfundarse as vestimentas do indiano para facer acto de presenza nun baile.
No mural tamén se representa a súa pega, un paxaro que segundo dicían os seus veciños e veciñas, avisábao da presenza da Garda Civil durante os tres anos que viviu fuxido polos montes do norte de Galicia. Toribio aspiraba a non ser un máis nunha época de pobreza e inxustiza social, e a un prezo moi alto, conseguiuno.
O encargado de dar vida no As Pontes enPezas á historia deste personaxe da nosa comarca foi Nove Noel, un dos muralista galegos máis talentosos, nado na vila de Rianxo (A Coruña). Noel é comunicador audiovisual e técnico en ilustración. Dende o ano 2008 dedícase á imaxe gráfica e a pintura mural. Dende entón traballou en numerosos festivais en España, Portugal, Alemaña e México.
A representación mural deste personaxe fíxose un oco entre os considerados como os mellores murais do mundo, colocándose na décimo terceira posición e situando a vila das Pontes nesta recoñecida plataforma internacional.
As Pontes enPezas é un proxecto de arte urbana e participación cidadá promovido polo Concello de As Pontes de García Rodríguez que conta xa con máis de 40 intervencións artísticas realizadas ao longo dos seus 3 anos de traxectoria. Ademais da rexeneración de espazos urbanos a través da arte, o proxecto conseguíu a creación dun museo público ao aire libre no que se implicou non só a artistas muralistas recoñecidos/as e a artista noveis, senón tamén á poboación local.