O parque eólico de Abadín e A Pastoriza recibe a autorización da Xunta

Prevé xerar unha produción neta anual de 104.844 megavatios hora (MWh), o que equivale a 3.615 horas de funcionamento a plena capacidade

A Xunta de Galicia concedeu a autorización administrativa de construción para o parque eólico “Penas Pardas”, promovido pola empresa Norvento e situado nos municipios lucenses de Abadín e A Pastoriza.

Segundo publica este xoves o Diario Oficial de Galicia (DOG), o proxecto contará cunha potencia evacuable de 26 megavatios (MW) e unha potencia instalada total de 29 MW.

O parque prevé xerar unha produción neta anual de 104.844 megavatios hora (MWh), o que equivale a 3.615 horas de funcionamento a plena capacidade. O investimento destinado á súa execución material supera os 18,4 millóns de euros, consolidando esta actuación como unha das principais iniciativas de enerxía renovable na comarca lucense.