O pavillón de Meira acolle un encontro solidario de baloncesto mixto a favor do Banco de Alimentos
O pavillón municipal de Meira será escenario este venres dun partido amigable de baloncesto mixto cun marcado carácter solidario. A iniciativa busca recoller alimentos non perecedoiros que posteriormente serán entregados ao Banco de Alimentos de Lugo.
O evento, promovido polos clubs CB Vila de Meira e CB do Lea de Castro de Ribeiras de Lea, enmárcase baixo o lema Amigable Solidario Mixto pola Igualdade e aposta tanto pola colaboración social como pola visibilización do deporte inclusivo.
Durante o desenvolvemento do encontro levarase a cabo a recollida de produtos básicos. Ademais, a organización comprométese a realizar unha achega adicional en quilos de alimentos, equivalente á suma total dos puntos anotados polos dous equipos ao remate do partido.
A xornada solidaria complétase coa entrega de rifas para participar no sorteo dunha cesta de Nadal. Cada quilo de alimentos doado dará dereito a unha participación, grazas á colaboración de diversos establecementos e entidades locais, así como de Merca Más Autoservicio Meira, que achega a cesta.
Con esta actividade, Meira volve amosar o seu compromiso coa solidariedade e o apoio ás persoas que máis o precisan, unindo deporte e acción social nun mesmo evento.