O Pedregal de Irimia acolle unha nova edición da Festa da Afirmación e a Dignidade
![Captura de pantalla 2019 09 18 a las 13.45.47](https://terrachaxa.com/wp-content/uploads/2019/09/Captura-de-pantalla-2019-09-18-a-las-13.45.47.png)
Este sábad0, 21 de setembro, terá lugar a VII Festa da Afirmación e a Dignidade no Pedregal de Irimia organizada pola Irmandade Manuel María e a Asociación Xermolos, coa colaboración do Concello de Meira.
O programa dará comezo ás 12.00 horas coa lectura do Manifesto da Afirmación e Dignidade, feito por Baldomero Iglesias Mero, así como dos comunicados elaborados por varios colectivos: representantes da Irmandade Manuel María, representante de Asociación Ecoloxista Adega, representante dos compañeiros e compañeiras privadas de liberdade por mor da lealdade á Terra e á Patria Madia Leva, representante da Asociación Poeta Avelino Díaz e outros.
Realizarase a entrega das Mans de Irimia, obra do creador Manuel Pardo Lopez de Meira, "ao distinguido amigo e profesor do entendemento desde a palabra e para os feitos" Isaac Alonso Estraviz, cun recoñecemento a Bernardo Penabade.
A título póstumo a recibirán a distinción Santi Caneiro, "construtor de tantas melodías e soños, amigo que recentemente foi navegar outras nostalxias", do que fará unha memoria do seu labor e merecementos Mero. O premio será entregado á súa compañeira e a filla María.
A parte musical da sesión correrá a cargo do Grupo de Gaiteiros do Padroado de Cultura Concello de Narón. Farase ao pé da ara de Prisciliano, obra de Xose Val Diaz.
Non faltará o xantar popular, ás 14.00 horas. Os interesados en asistir deben inscribirse coa organización (teléfonos: 646 413 890 / 630 217 035), e aboar 22 euros.
Finalmente, ás 16.30 horas rematará a programación cos recitais de música e poesía, na Praza do Convento de Meira, a cargo das Pandereteiras Nove Ferreñas de Meira, Cantareiras Sócratas e outras agrupacións musicais.
![70677660_2343611222559375_1762625170637324288_o](https://terrachaxa.com/wp-content/uploads/thumbs/2019/09/70677660_2343611222559375_1762625170637324288_o-200x266.jpg)