O polense Manuel Vázquez presenta en Meira a súa novela
![o-pracer-da-chuvia-meira-portada](https://terrachaxa.com/wp-content/uploads/2023/10/o-pracer-da-chuvia-meira-portada.jpg)
O escritor polense Manuel Vázquez, natural de Valonga, presenta este venres, 1 de setembro, ás 20.30 horas, na Casa do Concello de Meira o o seu libro O pracer da chuvia, da editorial Medulia. Unha actividade que está aberta a todos os públicos.
Manuel Vázquez reside en Lugo e traballa como celador de urxencias no Hospital Universitario Lucus Augusti. Publicou varios artigos noutros tantos periódicos dixitais durante o ano 2021. Ademais, participou co poema Homeless na obra colectiva Poetas do reencontro II, Punto Rojo (2021). O poema Baleas de terra aparece no número 24 da revista Xistral (2022).
Tamén prologou o libro de relatos curtos Paseando canguros, de Xesús Trashorras, editado por Medulia (2022); quen á súa vez prologa esta novela.
A novela, á parte de ser unha defensa e reivindicación do rural, é unha novela tamén de carácter urbano, representado fundamentalmente por cinco cidades: Lugo, A Coruña, Lisboa, París e Madrid.
Aquí podemos atopar personaxes reais do rural propios de García Márquez, coma o seu grande mestre da vida, Dositeo; o labrego Quinto de Serés; Marité, a súa sogra; Servando, aquel home listo, que ía por diante ; Eliseo, o seu avó, que morreu sendo el moi novo; as tres Mapoulas, asasinadas polos fascistas en Montecubeiro; Pedro da Vica que un día ao regresar da Gulpilleira a Aldegunde, despois de ver a súa moza, ao saltar unha parede foi caer enriba do lobo…
Pero tamén personaxes urbanos. É o caso de Celia, que facía a súa propia roupa e comía mazás con whisky, unha desas mulleres malas, que fumaba e quería ser independente, en palabras do autor; Ramona, nacida na Coruña e emigrante á Arxentina, onde coñeceu a Ricardo, outro emigrante de Pol; aquela muller de Lisboa, que lle dixo que ao escoitalo lle fixera lembrar as feiras de Óbidos; a mestra que por ter relacións cunha casada, foi estigmatizada e tivo que pedir traslado…” Extracto do prólogo de Xesús Trashorras.
![o-pracer-da-chuvia-meira](https://terrachaxa.com/wp-content/uploads/thumbs/2023/10/o-pracer-da-chuvia-meira-200x270.jpg)