O PP de Guitiriz presenta unha candidatura totalmente renovada
A candidatura do PP de Guitiriz, encabezada por José Manuel López, foi presentada onte á noite no restaurante A Casilla, no que tamén participou o Vicepresidente provincial, Francisco Conde, o secretario xeral do Partido Popular de Lugo, Javier Vázquez Nodal e o coordinador xeral, José Manuel Balseiro. Desde a dirección provincial lamentan a mala xestión do goberno actual que o único que fixo foi “retroceder a Guitiriz”. Neste sentido, Nodal explicou que “é necesario un cambio de goberno inmediato para reverter a situación” e trasladou a súa preocupación pola situación dos servizos prestados en Guitiriz. “Temos a 99 persoas en lista de espera para recibir o servizo do SAF a pesar de que hai máis de 450 horas dispoñibles. É unha vergoña”, di o secretario xeral.
O candidato popular presentou unha lista totalmente renovada e formada por mulleres (9) e homes (6) “totalmente comprometidos con Guitiriz” e que representan os principais eidos da sociedade. López explica que “é necesario darlle aos veciños a atención que merecen e resolver as cuestións que demandan e, por iso, temos unha lista totalmente renovada con xente moi nova que sentíronse representados polo noso proxecto e con persoas con experiencia na política municipal e que xa estiveron en anteriores gobernos do PP de Guitiriz”:
Durante o encontro, López subliñou os seus obxectivos prioritarios no caso de chegar á alcaldía. “Defendemos un proxecto de futuro asentado nun goberno estable que teña como obxectivos a atencións ás persoa e a mellora dos servizos, pero sobre todo a construción dun municipio con recursos para permitir o asentamento da poboación”. Neste sentido o alcaldable explicou que na súa folla de ruta unha das iniciativas máis importantes é a creación de solo industrial para potenciar o polígono industrial e impulsar ao mesmo tempo o asentamento da poboación en Guitiriz.
Pola súa banda, Francisco Conde asegurou que o PP busca facer do rural galego unha terra de oportunidades e destacou que Guitiriz merece un goberno local comprometido coa xeración de emprego e riqueza. Neste sentido referiuse á importancia de apostar pola simplificación administrativa e por adoptar medidas que favorezan a captación de investimento e posta en marcha de proxectos industriais a través dunha Administración próxima e da colaboración.
A CANDIDATURA
- José Manuel López Rodríguez
- Alexandre Losada Buide
- María Margarita Pereira López
- María Guadalupe Prado Tomé
- María Consuelo Raposo Cabo
- Roberto Fernández Buján
- Rebeca Tena Abuín
- María José González Roca
- José Luis López Vázquez
- Alzira da Conceiçao Trindade de Almeida
- María de las Nieves López Rodríguez
- Ángel Lobeiras Paz
- Casimiro Avelino Ares López
Suplentes
- Ana Rodríguez Bujan
- Manuel Castro Rico
