O PP de Guitiriz reclama explicacións sobre as obras da cuberta do taller de artesanía de Pardiñas
Os concelleiros do PP de Guitiriz pedirán acceso ao expediente completo de arranxo da cuberta do obradoiro de artesanía da escola de Pardiñas, tras ver como a obra se realizou “sen que o Concello de Guitiriz adxudicase os traballos”.
O voceiro popular, José Manuel López, explica que ao existir moitas dúbidas sobre a legalidade desta obra, no último pleno preguntamos a alcaldesa pola data exacta de licitación da obra. “A resposta que nos deu Marisol Morandeira deixounos perplexos, porque asegurou que o Concello de Guitiriz non adxudicara a obra a ninguén”, recordou.
José Manuel López engadiu que “non contenta coa súa resposta, a alcaldesa sentenciou a súa intervención indicando que “non sabe quen contratou a obra”.
O voceiro popular en Guitiriz quere deixar claro que “para nada estamos en contra destes traballos, todo o contrario, eran moi necesarios porque as numerosas goteiras existentes poñían en risco todo o material que alí se garda” pero “o que si que criticamos é que non se siga a legalidade, xa que senón se adxudicou a obra, quen ordenou realizar estes traballos?”.
Ante esta situación, José Manuel López pregunta se o Concello de Guitiriz poderá xustificar os traballos ante a Deputación, xa que segundo un acordo de colaboración entre ámbalas dúas administracións sería o ente provincial o que asumiría os 13.000 euros de custo dos traballos.
O voceiro popular engade que “soubemos as datas de inicio e fin dos traballos grazas ás redes sociais e aos medios de comunicación” xa que “o comezo da obra foi o 12 de febreiro, segundo publicaron nas redes sociais do BNG de Guitiriz, e remataron en torno ao 21 de febreiro”.
“Unha mostra máis de que nin Marisol Morandeira nin ninguén do seu equipo de goberno souberon algo sobre este arranxo ou, polo menos, iso é o que din dada a falta de cumprimento da legalidade”, rematou.