O PP de Vilalba constitúe o comité executivo
A nova executiva planificou o seu traballo co obxectivo de “ser útil aos veciños” e, polo tanto, “centrado no contacto directo cos vilalbeses”.
O Partido Popular de Vilalba, que celebrou recentemente o seu congreso no que resultou elixida Sandra Vázquez como presidenta, vén de constituír o comité executivo local.
A executiva xa está a traballar “centrada en Vilalba, nas necesidades actuais dos veciños e na construción do futuro do municipio tendo en conta a súa historia, o seu potencial e, especialmente, a opinión dos vilalbeses”, manifestou a presidenta.
A primeira xuntanza, na que os membros da executiva participaron de forma presencial ou telemática, serviu para planificar o seu traballo co obxectivo de ser útil aos veciños e, polo tanto, centrado no contacto cos vilalbeses “para coñecer de primeira man a súa realidade, escoitar as súas necesidades, suxerencias ou reivindicacións”.
Vázquez subliña “o compromiso amosado por todos os membros” da executiva que se vén de renovar e que conta con persoas de distintos ámbitos. “Cada un dos vicesecretarios ou vicesecretarias coordinarán unha área que coñecen”, destaca.
Xunto á presidenta do PP de Vilalba, Sandra Vázquez, integran o comité executivo: Pepe Franco como secretario xeral; Sandra Rivas como secretaria de Participación e Acción Electoral; José Antonio Pita como secretario de organización; Carmen Otero como vicesecretaria de Política Social e Maiores; Pepe Janeiro, vicesecretario de Deportes e Tecido Asociativo; Sandra de Bernardo, vicesecretaria de Comunicación; José María García-Leira Boado, vicesecretario de Promoción Económica, Iniciativa Empresarial e Industria; Agustina Fernández, vicesecretaria de Sanidade; Paula Gesto, vicesecretaria de Infancia e Xuventude, Gaudi Pérez, vicesecretario de Medio Rural e Medio Ambiente; Patricia Teijeiro, vicesecretaria de Cultura e Educación; Inmaculada Ramudo, vicesecretaria de Infraestruturas e Mobilidade; Flor Rey, vicesecretaria de Igualdade; e Begoña Novo, vicesecretaria de Comercio e Turismo.
BOLETÍN INFORMATIVO
Os populares presentaron tamén un boletín que está xa chegando ás casas dos vilalbeses e que recolle información sobre o traballo que está a desenvolver o PP de Vilalba, incluíndo algunhas das propostas recollidas nas xuntanzas cos veciños que o goberno local non está a atender.
O boletín recolle tamén a postura crítica do PP vilalbés con respecto ás decisións do goberno do PSOE en relación a distintos asuntos que considera importantes para Vilalba: a imposición da unidireccionalidade na rúa da Pravia, a abandono do polígono industrial, o desprezo ao rural, o despilfarro de grandes cantidades de diñeiro para desfacer o que estaba feito -como é o caso do parque acuático da Madalena- ou a falta de xestión dos socialistas que neste mandato aínda non foron capaces de elaborar uns presupostos municipais e gobernan cos elaborados polo goberno do PP prorrogados, a pesar de que no seu día votaran en contra da súa aprobación igual que Vilalba Aberta.