O PP de Vilalba ve innecesario o investimento no campo da feira mentres haxa problemas de abastecemento de auga
O PP de Vilalba denuncia “unha nova obra carente de sentido” tras coñecer como a alcaldesa, Marta Rouco, xunto á presidenta da Deputación, Carmela López, anunciaron un investimento duns 230.000 euros para unha actuación que“non responde ás prioridades da cidadanía”.
Desde o PP de Vilalba consideran que existen necesidades moito máis urxentes ás que o goberno local segue sen dar resposta. Un exemplo evidente é a situación da rede de abastecemento e saneamento na rúa Cidade de Viveiro, onde nas últimas dúas semanas se produciron varias roturas que provocaron cortes e numerosas molestias aos veciños da zona.
Os populares lembran que a renovación desta infraestrutura foi reclamada polo seu grupo dando traslado as peticións feitas polos veciños e veciñas da zona, advertindo do deterioro da rede e da necesidade de actuar con urxencia para evitar os problemas que precisamente se están a producir agora.
Ademais, dende o PP de Vilalba sinalan que a actuación anunciada polo goberno local provocará a perda de prazas de aparcamento nun municipio no que xa é especialmente complicado estacionar, unha circunstancia que está a xerar un importante malestar entre moitos veciños.
Para os populares, este novo anuncio evidencia que o goberno local encabezado, por Marta Rouco, vive cada vez máis afastado das necesidades reais da veciñanza, tomando decisións por impulso ou por conveniencia política, en lugar de establecer prioridades claras e atender as demandas máis urxentes do municipio.
Nesta liña, os populares lembran tamén actuacións recentes como o asfaltado de varias pistas e camiños “á carta” e executado de forma “lowcost”, nas que se priorizou a renovación de vías de titularidade municipal que dan servizo a cargos socialistas, como é o caso da parroquia de Mourence, mentres continúan sen atenderse camiños e pistas que utilizan a diario numerosos veciños para acceder ás súas vivendas, explotacións agrarias ou servizos básicos.
A realidade é que as decisións que está a tomar o equipo de goberno de Marta Rouco “están a acotar o espazo” para as feiras (tanto as mensuais como as semanais), xa que “cómpre recordar que as sacaron da Praza de Santa María, Coronel Pena e Praza de San Juan” e agora “esta obra que veñen de anunciar quita espazo, non só para o estacionamento dos feirantes, senón tamén para os veciños de Vilalba y dos municipios limítrofes que asisten á feira”.
No PP de Vilalba ven “con moita preocupación” como todas estas decisións están a provocar unha diminución no número de feirantes que acoden os días de feira polo que “se o goberno de Marta Rouco segue nesta liña moito nos tememos que estas feiras desaparezan do noso concello, a pesar de ser un dos nosos sinais de identidade”.
Desde o PP de Vilalba insisten en que o municipio precisa planificación, rigor e investimentos nas infraestruturas realmente necesarias, e non actuacións propagandísticas que non responden ás preocupacións da cidadanía.