O PP esixe de novo a Tomé que permita o acceso á nave de Begonte
![nave-deputacion-begonte](https://terrachaxa.com/wp-content/uploads/2023/12/nave-deputacion-begonte.jpg)
Os deputados do Grupo Provincial Popular veñen de rexistrar por cuarta vez a solicitude de acceso á nave de Begonte, propiedade da Deputación provincial de Lugo, xa que José Tomé, o PSOE e o BNG seguen instalados “no máis absoluto escurantismo” e “manteñen o veto de entrada” nesta instalación provincial.
O voceiro popular Antonio Ameijide recorda que pese á intención exposta polo Grupo Provincial Popular, nas comunicacións realizadas o 24 de novembro de 2023, 29 de febreiro e 3 de abril de 2024, de “acceder” ás naves situadas no polígono de Carral, en Begonte, “o equipo de goberno non fixo posible que se levara a cabo a mesma”.
Ameijide fai referencia á resolución da Valedora do Pobo, do 15 de marzo de 2024, en relación á pretensión de deputados do Grupo Provincial Popular de visitar dependencias provinciais, na que se conclúe que “se debe garantir” a libre entrada por parte dos mesmos ás instalacións que son de atención directa á cidadanía e que, por outra banda, respecto ás que non o son “o réxime de acceso sería o dunha sinxela comunicación previa, non o de autorización”.
Pese a esta resolución, José Tomé “segue a pensar que está por enriba do ben e do mal” e respondeu nun escrito, con data 19 de abril de 2024, que é imprescindible “a presentación dunha solicitude de acceso e especifica que esta será resolta establecendo o día e a hora de acceso, o persoal provincial que acompañará á visita e as medidas adoptadas para garantir a seguridade”.